'వకీల్‌సాబ్‌' హక్కులు దక్కించుకున్న అమెజాన్‌ ప్రైమ్..రిలీజ్ ఎప్పుడంటే.!

పవర్ స్టార్ పవన్‌ కల్యాణ్‌ హీరోగా నటిస్తున్న 'వకీల్‌సాబ్‌' మూవీని అమెజాన్ ప్రైమ్ సొంతం చేసుకున్నట్లు తెలుస్తోంది. శ్రీరామ్‌ వేణు దర్శకత్వంలో దిల్‌రాజు, శిరీష్‌ నిర్మాతలుగా ఈ మూవీని తెరకెక్కిస్తున్నారు. ఈ చిత్రాన్ని ఏప్రిల్‌ 9న విడుదల చేయబోతున్నారు. హిందీలో విజయవంతమైన 'పింక్‌' చిత్రానికి రీమేక్‌ ఇది. 'ప్రపంచవ్యాప్తంగా భారీ స్థాయిలో విడుదల చేయడానికి సన్నాహాలు చేస్తున్నట్లు మూవీ టీం తెలిపింది. ఇటీవల విడుదలైన టీజర్‌కు మంచి స్పందన సైతం లభిస్తోంది.

ఈ మూవీలో శృతిహాసన్‌, నివేదా థామస్‌, అంజలి, అనన్య నాగళ్ల తదితరులు నటిస్తున్నారు. పవన్ మూడేళ్ళ తరువాత తెర మీద కనిపించబోతుండటంతో అభిమానులు సినిమా విడుదల కోసం ఆతృతగా ఎదురు చూస్తున్నారు. తాజాగా వకీల్ సాబ్ డిజిటల్ రైట్స్ ను ప్రముఖ సంస్థ అమెజాన్ ప్రైమ్ సొంతం చేసుకున్నట్లు తెలుస్తోంది. భారీ రేటుకు ఈ సినిమా హక్కులను కొనుగోలు చేశారని సమాచారం. అయితే నిర్మాత దిల్ రాజు 'వకీల్ సాబ్' సినిమా థియేటర్లో విడుదల అయిన 50 రోజుల తరువాతే అమెజాన్ లో ప్రసారం చేయాలని కండీషన్ పెట్టాడట. టీవీ శాటిలైట్ హక్కులను ప్రముఖ జీ స్టూడియోస్‌ వకీల్ సాబ్ శాటిలైట్‌ హక్కులను దక్కించుకుందని సమాచారం.