విజయవాడలో ఒకేరోజు 29 సెంటీమీటర్ల రికార్డు స్థాయి వర్షపాతం.. గత 30 ఏళ్లలో ఇదే అత్యధికం

విజయవాడలో వర్షం సృష్టించిన విళయం అంతా ఇంతా కాదు. ఎడతెరిపిలేని వర్షం వల్ల నగరం అతలాకుతలమైంది. నగరంలో ఒకరోజు వ్యవధిలో 29 సెంటీమీటర్ల వర్షపాతం నమోదైందని, గత 30 ఏళ్లలో ఇదే అత్యధికమని అధికారులు తెలిపారు. ఈ మేరకు పలు కాలనీల్లో 4 అడుగుల మేర నీరు నిలిచింది. భారీ వరదకు బుడమేరు కట్ట, అంబాపురం పాముల కాలువ, వాగులేరు కట్టలు తెగటంతో సుందరయ్య నగర్, ప్రకాష్ నగర్ రహదారులు జలమయమయ్యాయి. ప్రకాశం బ్యారేజీ 70 గేట్లు ఎత్తి నీటిని విడుదల చేశారు.