భార్య, కుమారుడితో జెన్‌కో ఉద్యోగి అదృశ్యం

నల్గొండ జిల్లా నాగార్జునసాగర్‌ జెన్‌కోలో పనిచేస్తున్న ఓ ఉద్యోగి కుటుంబం అదృశ్యం కలకలం రేపుతోంది. తన కుటుంబంతో ఆత్మహత్య చేసుకుంటున్నట్లు అతని ఇంట్లో ఉత్తరం పెట్టి అదృశ్యమైన ఘటన గురువారం చోటుచేసుకుంది. ఈనాడు కథనం ప్రకారం నాగార్జున సాగర్‌లోని పైలాన్‌లోని జెన్‌కో కాలనీ 9హెచ్‌లో నివాసముంటున్నరామయ్య(36)అనే జెన్కో ఉద్యోగి ఆర్థిక, అనారోగ్య సమస్యలతో బాధపడుతున్నాను. తానొక్కడిని చనిపోతే తన భార్య నాగమణి(30), కుమారుడు సాత్విక్‌(12) అనాథలవుతారనే ఉద్దేశంతో వారిని కూడా తోడు తీసుకెళ్లినట్లు లేఖలో పేర్కొన్నారు. కొత్త వంతెనపై అతని ద్విచక్ర వాహనం, చరవాణి ఉండడంతో అక్కడి నుంచి దూకి ఆత్మహత్య చేసుకున్నట్లు పలువురు అనుమానిస్తున్నారు. ఘటనా స్థలానికి చేరుకున్న పోలీసులు, బంధువులు నదీతీరంలో ఉదయం నుంచి గాలింపు చర్యలు చేపట్టారు. పోలీసులు విచారణ చేపట్టగా రామయ్య, అతడి భార్య, కుమారుడు ద్విచక్రవాహనంపై వెళ్లినట్లు సీసీ కెమెరాలో ఆనవాళ్లు కనిపిస్తున్నాయి. తిరుమలగిరి (సాగర్‌) మండలం చింతల పాలెం గ్రామానికి చెందిన రామయ్య వ్యవసాయ భూమి టెయిల్‌పాడ్‌ ప్రాజెక్టు నిర్మాణంలో భాగంగా ముంపునకు గురైంది. అతనికి నిర్వాసితుల కింద జెన్‌కోలో అటెండర్‌ ఉద్యోగం ఇచ్చారు. బంధువుల నుంచి ఎలాంటి ఫిర్యాదు అందలేదని ఎస్సై నర్సింహరావు తెలిపారు.